Hinugot sa tadyang : (non-fiction) / Lualhati Baustista.

Malalaking negosyo ng kasuutan ang nagtakda ng kulay na rosas para sa sanggol na babae at asul para sa lalaki. Ang rosas daw kasi ang kulay na sumisimbolo sa pag-ibig, kagandahan, kabaitan, tamis at romansa. Ang asul naman daw ang kulay ng lakas, talino at katapangan. Nag-akyat sa kanila ng limpak-limpak na salapi ang kampanyang ito. *** Ang mga fairy tales ay ginamit na propaganda ng diktadurang si Adolf Hitler sa panahon ng Nazi Germany o Third Reich, bilang suporta sa pagbabawal o total ban ng kanyang gobyerno sa pagkakaroon ng edukasyon o career ng mga babae. *** Sa ilalim ng Code of Hammurabi, ang babaing may asawa, pag nagahasa, pareho sila ng nanggahasa na parurusahan ng kamatayan. Puwede pa rin namang patawarin ng hari ang lalaki at siya, puwede pa rin namang isalba ng kanyang asawa. Kaya kapag pinatawad ng hari ang lalaki at siya ay hindi pinatawad ng asawa niya, siya pa ang lalapatan ng parusang kamatayan. *** Pagkababa ng Martial Law, sinunog ng puwersa ng gubyerno ang buong coastal village ng mga Muslim sa Malisbong, Palimbang sa Mindanao. Lahat ng babae ay magdamag na ikinulong sa mga barko ng Navy at Marines at ginahasa. Marami sa kanila ang nasiraan ng bait sa dinanas na torture at sa pagkalipol ng isang libo at limandaang kalalakihan nila na inipon ng mga sundalo sa mosque at pinagbabaril.