Cory Aquino at militarisasyon / Pedro V. Salgado.

Nananatiling bihag ng mga huwaran, impluwensya at kontrol na Kanluranin ang ating ekonomiya, kultura at lipunan. Kahit totoo na mas maraming mamamayang tumaas ang kamulatang pampulitika sa pakikibaka para patalsikin ang diktadurang Marcos, dapat nating kilalanin na marami pa ring Pilipino ang nakagapos sa iba't ibang alamat tungkol sa ating nakaraan, sa ating ekonomya, sa mga ideolohiyang pampulitika at ganoon din sa demokrasya mismo. Pamana ng kasaysayan ang ganitong mga baluktot na palagay na siyang nagbunga ng di angkop na mga aksyon sa kasalukuyan at depektibong pananaw sa ating hinaharap. Isang dahilan nito ang pangyayaring ang mga makabayan nating tagapagpahayag, tulad ng sinasabi nila mismo, ay biktima ng lisyang edukasyon. Dahil tinuruan sila sa isang dayuhang lenggwahe, patuloy silang nagpapahayag sa lenggwaheng ito. Ang ganito'y nangangahulugan na hindi naaabot ng mga ideya nila ang milyun-milyong kapwa Pilipino at, mas importante pa, sila mismo'y nahihiwalay sa isang mahalagang bahagi ng realidad. Panahon nang kumilos nang sa ganoo'y malunasan ang artipisyal na napagkakahating ito na nagpapahina sa magkabilang panig. Kung sa bagay, mas mahusay gumamit ng pambansang wika ang nakakabatang Pilipino at ito'y isang kasiya-siyang pagbabago, pero kakaunti pa rin ang inilalabas na seryosong sulatin sa orihinal na Pilipino.