Nobelang tagalog anino ng kahapon / Katha ni Francisco Laksamana.

Ngunit kailangan ang kaunting paliwanag sa panahong ito ng mga bomba at comics bago basahin ng mga kabataan ang Anino ng Kahapon, na nilimbag noong 1907, at naglalarawan ng mga "kapanahunang malungkot ng kapilipinuhan." "Kapanahunang malungkot" din ng sambayanang Pilipino ang panahong kasalukuyang (sa kuru-kuro ng PPP). Datapwa't nasa atin na rin ang ating ikaliligtas. Kung mayroon tayong pagsisikap at kamalayang panlipunan, sariling dangal at katapangan, na maidaragdag sa pinag-aralan, hindi magwawagi ang bisa ng mga maniniil at manlulusob, na sa mga panahong ito ay nanggugulo sa ating bansa. Mapupuna ng mga mambabasa sa nobelang ito, na ang pinakamatinding tema ay tungkol sa kalayaan. Isinalarawan ni Mang Isko ang kalagayan ng ating mga ninuno, na lagi na lamang pinaghaharian ng takot at sindak dahil sa kawalan ng kasarinlan. Sa pamamagitan ng katapangan, ng kaliwanagan ng pag-iisip, at ng pagmamahal, natuklasan ni Modesto ang unang landas na patungo sa Demokrasya. Kawili-wiling basahin ang nobelang ito, sapagkat ang mga tauhan, ay may mga ugaling makabago, na maipapantay sa lalo mang pinakamatapang sa panahon nating kasalukuyan, sa may pinakamarubdob na pagmamahal, at sa may paniniwala sa bisa ng Pananalig, Pag-asa at Pagmamahal. (Paunang Salita)