Tinig at kapangyarihan : mga kuwentong buhay ng kababaihang manggagawa sa bahay / Rosalinda Pineda Ofreneo.

In Tagalog.

Includes bibliographical references.

Sa Pamamagitan ng paglalahad at pagsusuri ng kanilang makukulay na mga kuwentong buhay, inangkin ng sampung kababaihang manggagawa sa bahay ang kanilang tinig at kapangyarihan na dati-rati ay hindi nadidinig at hindi nadadama ng lipunang kanilang ginagalawan. Nagkalaman at nagkaroon ng kabuluhan ang kanilang mga isinalaysay bilang mga babae at bilang mga manggagawa sa pamamagitan ng lahukang pananaliksik na isinagawa ng may-akda at iba pang kasamang mananaliksik sa pakikipagtulungan sa kanilang organisasyon - ang PATAMABA. Nabigyan ng malawak na konteksto ang mga kuwento sa masusing pagtalakay ng kalagayan ng mga mananahi, magbuburda, at manggagantsilyo sa industriya ng damit sa lalawigan ng Bulacan na nakakonekta sa pandaigdigang pamilihan sa pamamagitan ng kadena ng subcontracting. may malalim ding pagtalakay sa mga batis na teoretikal na pinaghanguan ng di-pangkaraniwang paksa at kakaibang metodolohiyang ginagamit. Nagkaroon din ng tagos sa tunay na buhay nang tinalakay ang mga implikasyon ng mga resulta ng pananaliksik sa praktikal na pagkilos. Si Rosalinda Pineda Ofreneo ay kasalukuyang nagtuturo sa Programa ng Kababaihan at Kaunlaran, Kolehiyo ng Gawaing Panlipunan at Pagpapaunlad ng Pamayanan, Unibersidad ng Pilipinas (UP), Diliman, siya ay tunay na produkto ng UP, sapagkat dito siya nag-aral mula kindergarten hanggang sa siya ay matapos bilang Doktor ng Pilosopiya (Philippine Studies). Ngunit siya rin ay produkto ng lansangan at kabukiran, kung saan siya ay nag-aral at natuto kapiling ang mga manggagawa, magbubukid, maralitang tagalunsod, at iba pang sangaysa halos 30 taon niyang pakikilahok sa kilusang kababaihan. Ang aklat na ito, na ibinatay sa kanyang disertasyon, ay isa sa marami na niyang akda bilang manunulat, mananaliksik, at manunula. Kabilang sa iba pa niyang mga aklat ang The Manipulated Press - A History of Philippine Journalism Since 1946, at The Philippines - Debt and Poverty. Nitong 1999, nailabas din ang Carrying the Burden of the World-Reflections on the Effects of the Crisis on Women and Girls, isang kolektibong pagpupunyagi na pinangunahan niya bilang co-editor at contributor.