Linggo ng Wika '90.

Ang paksang-diwa ng pagdiriwang ng Linggo ng Wika sa taong ito (Aug. 13-19) ay "Igalang Natin ang Konstitusyon, Wikang Filipino ay Isulong". Napakahalaga ng paksa sapagkat tuwirang tumutukoy sa Republika ng Pilipinas, partikular sa Filipino na wikang nasyonal at opisyal. Napapanahon sapagkat sa pagpasok pa lamang ng dekada 90 ay dumagsa na ang mga mapanirang komentaryo at mga walang taros na argumento laban sa wika mula sa mga artikulo at kolum sa mga iba't ibang babasahin. Sa binalak o hindi man, ang mga pahayag at pangangatwirang anti ay humantong sa pinakahuling dagok ng mgapangyayari--pagsampa ng petisyon ng Gobernador ng lalawigan ng Cebu,--sa ngalan ng iba pang mga petisyoner--sa Regional Trial Court ng Cebu ng preliminary injunction na humihiling na pigilin ang Kagawaran ng Edukasyon, Kultura at Isports (DECS) sa pagpapatupad ng dalawang kautusang pangkagawaran (DECS Order No. 52 s. 1987 at DECS Order No. 54 s. 1987 at ng atas ng Pangulo Blg. 335 s. 1988 na diumano ay ilegal at labag sa Konstitusyon.