Ang kasaysayang lokal ng Tanauan.

Ang aklat na pinamagatang Ang Kasaysayang Lokal ng Tanauan na sinulat ni Dr. Imelda J. Dumaual, isa sa mga guro ng Agham Panlipunan ng De La Salle University-Dasmariñas, ay isang paraan upang higit na maipakilala ang yaman ng ating bansa. Naipaliwanag dito ang kahalagahan ng kasaysayan ng Tanauan sa iba't ibang panahon. Naipakilala din sa aklat na ito kung ano ang kasalukuyang kalagayan nang nasabing bayan. Malaking ambag din sa aklat na ito ang pagtipon sa mga talambuhay ng mga Tanaueñong nakilala sa lokal at pambansang pag-unlad tulad nina Apolinario Mabini at Jose P. Laurel. Mahalagang ambag ang aklat na ito sa lalong pagpapalawak ng kasaysayang lokal ng mga bayan at lalawigan sa ating bansa sapagkat iilan pa lamang ang naililimbag na mga aklat tungkol dito. Sa pagsasaliksik ng mga sekondaryang batis tungkol sa timog katagalugan ay makikita ang kasalatan ng mga impormasyon ito sa mga aklatang pampubliko man o pribado. Dahil sa kakulangan ng mababasa tungkol sa kasaysayang pambayan, kaya hindi pa rin matukoy ang kolektibong kasaysayan ng ating bansa. Ang aklat na ito ay pagtugon sa kakulangang ito upang higit na maunawaan ang kontribusyon ng bayan ng Tanauan sa pambansang kaunlaran. Bilang isa sa mga nangunguna sa pag-unlad ng kasaysayang lokal sa ating bansa nagagalak po ang Cavite Studies Center ng De La Salle University-Dasmariñas sa lathalaing ito sapagkat naniniwala ang aming ahensiya na malaki ang maitutulong ng aklat na ito sa lalong pagpapaunlad ng kamalayan ng ating mga kabataan sa kanilang pinagmulan. --Paunang Salita ng Libro.