Kolonyal na patakaran at ang nagbabagong kamalayang Filipino : musika sa publikong paaralan sa Pilipinas, 1898-1935 / Raul C. Navarro.

Sa pag-aaral ni G. Navarro, pinagsikapan niyang saliksikin ang mga hayag at di-hayag na patakarang kolonyal sa larangan ng musika at ang implikasyon nito sa kamalayan ng katutubo. Kinalap niya ang mga materyal na artifak tulad ng mga awit o musika, mga opisyal na dokumento, at mga aklat pangmusika, at sinuri ang mga ito gamit ng teorya ni Foucault, ang iba pang kabatiran mula sa kritikal na teorya, at ang mga napagtagumpayan ng Sikolohiyang Pilipino sa pangkalahatan. Ibinunga nito ang isang pagbasa sa mga datos na nagpapatingkad sa mahigpit na ugnayan ng musika, kultura, at politika, at kumikilala sa masasalimuot na proseso at bias ng kolonyalismo, habang itinatampok din ang larawan ng pakikibaka ng mga Pilipino. Nag-aambag ang pag-aaral ni G. Navarro sa iba't ibang larangan. Hindi lamang musika ang naging materyal ng pag-aaral kundi ang malawak na larang ng mga pangkulturang praktis. Ang totoo, ang kultura at politika ang naging tuon ng pag-aaral ng mga tekstong may kinalaman sa musika tungo sa imbestigasyon ng konstruksiyon nito. Ikalawa, sa pamamagitan ng makatuwirang paggamit ng teoryang pinanday sa kanluran kasabay ng mga teoryang nilinang sa bakuran ng Pilipinohiya, nakapagpalitaw ang mag-aaral ng bago at makabagong interpretasyon sa musika at sa edukasyong pangmusika sa bansa. Ikatlo, interdisiplinaryong lapit upang bigyang-linaw ang di-gaanong nasisipat pang mga aspekto ng kultura at kasaysayang Pilipino. (Source: http://www.kabayancentral.com/)