Tanza : bayang sinilangan ng pamahalaang rebolusyonaryo ng Pilipinas / Emmanuel Franco Calairo.

Ang kasaysayan ay tunay na sumasalamin sa diwa, kultura, pamumuhay, paglingap at pag-ibig ng mga tao sa bayan at sa Diyos. Sa ganitong diwa maipapamalas ang katutubong istorya ng Tanza sa pamamagitan ng aklat na ito na pinamagatang Tanza: Bayang Sinilangan ng Pamahalaang Rebolusyonaryo ng Pilipinas na isinulat ni Dr. Emmanuel Franco Calairo sa pamamatnubay ni Mayor Raymundo del Rosario at kanyang mga kasama. Ang Tanza (dating Santa Cruz de Malabon) ay umugit sa ating kasaysayang pambansa noong si Heneral Emilio Aguinaldo ay nanumpa bilang pangulo ng Unang Pamahalaang Rebolusyonaryo sa kumbento ng Simbahang Katoliko sa bayang ito. Ito ay naganap noong Marso 23, 1897. Sa bayan ding ito isinilang si Don Felipe Calderon, ang sumulat at itinuturing na awtor ng Saligang Batas sa Malolos. Marami pang katutubong taga-Tanza ang nagbigay karangalan at nakapag-ambag sa pambansang pag-unlad lalo na sa larangan ng pulitika, edukasyon, siyensya, medisina, hustisya, musika, industriya at iba pa. Lubos kaming umaasa na katulad ng nakalipas ay lalong pag-aalabin ang mga mamamayan ng Tanza ang kanilang pagpupunyagi upang lalong mapalaganap at mapagtibay ang diwa ng mga bayani at ng mga magigiting na Kabitenyo sa lahing Pilipino. Ang aklat na ito ay dapat mabasa ng mga mamayan ng Tanza upang lalo nilang maunawaan ang makulay na kasaysayan ng kanilang bayan at gayundin ng lahat na may pagmamahal sa bayan lalo na ang mga kabataan upang ang yaman ng nakaraan ay magsilbing inspirasyon sa kasalukuyang panahon.