Pusod / Domingo G. Landicho.

Ang Pusod ay isang makabagong nobela na sumusuri sa ugnayan ng tao at ng kalikasan. Isa itong nobela ng karupukan at katatagan ng tao sa sinapupunan ng baha, paglulunti ng palay, at pagkahinog ng mumunting butil ng uhay. Ipinakikita ng nobela ang pagtatadhana ng kapaligiran sa buhay ng tao sa isang kanayunan na pinatitingkad ng angkop na paglalarawan at kaaya-ayang istilo ng pagkatha. Sa pagsilang ng tao'y sangkap na ng kanyang kalikasan ang tibay at hina na papandayin ng udyok ng makataong mithiin at tukso ng kalikasan, waring isang biblikal na tadhana nina Adan at Eba. Napakalaking bahagi ang uhay at baha sa pandayang ito ng kalikasan ng tao sa pusod wari ng isang katadhanaan. Ang Pusod ay isang nobelang mapaghamon sa damdamin at imahinasyon at hitik ng metapora, simbolismo, pantasya, at salamangka sa realismo. Mula sa simula, ang mambabasa ay waring iduduyan ng isang pambihirang karanasan na magaganap sa isang mitikal na paraiso.