Kulturang Pilipino / Renato Perdon.

Kulturang Pilipino Ang Kulturang Pilipino ng mga magulang ng mga batang isinilang sa ibang bansa ay isang mahalagang pamana sa mga bagong salin ng kasalukuyang henerasyon. Marami sa kanila ang may hangarin na malaman ang kultura ng bansang kanilang pinagmulan. Hindi sapat ang mga aklat o babasahin sa ibang bansa ukol sa kulturang Pilipino, na magagamit ng mga magulang upang ipamulat sa kanilang mga anak ang mayamang kalinangan ng ating bansa. Hangad nating lahat na ikintal sa bawat Filipino, saan mang dako ng mundo, ang pagmamahal sa ating lahi at ang maipagmalaki ito ng buong puso. Pag-alabin nating muli ang damdaming makabayan sa kabila ng milyang layo sa pinakamamahal nating Pilipinas, ang perlas ng silanganan. Ito ang pangunahing dahilan ni Renato Perdon na magsaliksik, pag-aralan at bumuo ng isang sangguniang aklat para sa kaalaman tungkol sa kulturang Pilipino. Ang bagong aklat na ito ay makakatulong sa pagpapanatili at pagpapalaganap ng kultura at mga sining ng Pilipinas sa ibang bansa. Binabati natin ang may-akda. EMELITA V. ALMOSARA, CESO IV Executive Director III Pambansang Komisyon sa Kultura at mga Sining. Nang mabasa ko ang pruweba ng libro ni Renato Perdon, kumintal sa akin ang dunong niya sa kasaysayan. Tinipon ng istoryador ang mga halimbawa ng mga gawi at tradisyon ng kanyang mga kababayan. Isinalarawan niya ang mga pakiwari sa kulturang Pilipino. Layunin niyang patingkarin ang pagkabukod-tangi ng bansa at patatagin pa ang rangya ng pamanang pangkultura. Mula sa pampamayanang pagbabahagihan at sa mga pista hanggang sa pragmatikong hirayang umakay sa mga aswang at manananggal sa kaisipang Pilipino, tagumpay ang awtor sa pagpinta ng nasyong namumutiktik ng mga interesanteng kulay. Nagbabago ang kulay mula sa tingkad ng isang dulo pakabila, gaya ng pagkarelihiyoso ng isang panig, at ang paniniwala sa mga tiyanak, ponso at anting-anting sa kabila. Pero sambagay ang tiyak, ang timpalada ng Pilipinong kulay ay malayo sa kawalan ng latoy. Ang paglakip ng awtor ng mga alagad ng sining na nakatala sa panahon ng kopong-kopong hanggang sa kasalukuyan at nakapagpatingkad lalo sa kalugud-lugod basahing kalipunang ito. -ROBERTO O. UMIL, Palanca, Amado V. Hernandez at Salvador P. Lopez Literary Awardee. Hindi mabibilang ang mga kababayang naninirahan sa labas ng bansa na may sama ng loob hinanakit sa kanilang mga anak o apo dahil hindi sila maintindihan lalo na ng kanilang mga kamaganak sa Pilipinas. Marami ring kababayan ang pumupula sa nakababatang henerasyon, dahil walang alam sa kulturang Pilipino at mukhang ikinahihiya pa na sila ay may dugong Pilipino. Itong aklat ni Renato Perdon, Kulturang Pilipino, ay magbabalik sa mga Pilipinong tumatanda na sa labas ng bansa ang mga alaala ng iniwang bayan at mahalagang tulong sa mga magulang sa pagbabahagi at pagpapaunawa sa kanilang supling ang tungkol sa kultura ng Pilipinas, ang kasaysayan, kaugalian, kasabihan at pamahiin, mga alamat at katutubong kanta at sayaw, tula at iba pa. -EDDIE FLORES-Editor Munting Nayon News Magazine The Netherlands.